МОНГОЛ, СИНГАПУРЫН ХООРОНД ДИПЛОМАТ ХАРИЛЦАА ТОГТООСНЫ 55 ЖИЛИЙН ОЙГ ТЭМДЭГЛЭВ
2025 оны 6 дугаар сарын 27-ны өдөр Монгол Улсаас Бүгд Найрамдах Сингапур Улсад суугаа Элчин сайдын яам Үндэсний их баяр Наадам - Ардын хувьсгалын 104 жилийн ой болон Монгол Улс, Бүгд Найрамдах Сингапур Улс хооронд дипломат харилцаа тогтоосны 55 жилийн ойн хүндэтгэлийн хүлээн авалт зохион байгууллаа.
Монгол Улсаас Бүгд Найрамдах Сингапур Улсад суугаа Онц бөгөөд Бүрэн эрхт Элчин сайд С.Энхбаяр хүлээн авалтыг нээж үг хэлэхдээ хоёр орны харилцаанд болж өнгөрсөн түүхэн үйл явдлууд, хамтын ажиллагааны талаар товч дурдав.
Хүлээн авалтын хүндэт зочноор оролцсон Бүгд Найрамдах Сингапур Улсын Гадаад хэргийн болон Худалдаа, үйлдвэрлэлийн яамны Төрийн сайд хатагтай Ган Сяо Хуан Сингапурын Засгийн газрын өмнөөс нийт зочдод баяр хүргэн үг хэлж, хоёр талын харилцаа, хамтын ажиллагаа амжилттай хөгжиж байгаад сэтгэл хангалуун байгаагаа илэрхийлэв.
Хүлээн авалтын эхэнд Монгол, Сингапурын төрийн дууллыг “Хуур магнай” чуулгын уртын дуучин Ганболдын Наранжаргал дуулж, ЦДБЭЧ-ын гоцлол морин хуурч, СТА Баатарнумын Амарсайхан эгшиглүүлэв.
Тус арга хэмжээнд Сингапурын ГХЯ болон бусад яамд, хамтран ажиллагч байгууллагын төлөөлөл, хувь хүмүүс, гадаад орнуудаас суугаа Элчин сайд нар болон Сингапур дахь Монгол иргэдийн төлөөлөл зэрэг нийт 100 орчим зочид хүрэлцэн ирж оролцлоо.
Монгол-Сингапурын найрсаг харилцаа улам бүр хөгжин цэцэглэх болтугай.